Wee (kanan) nyuaka 539 iti pom peminta KGC ngagai Joni seraya diperatika Fatimah (dua kanan) enggau sida ke bukai, kemari. — Gambar Muhamad Rais Sanusi

NERIMA TIMBAL KE MANAH: Wee (kanan) nyuaka 539 iti pom peminta KGC ngagai Joni seraya diperatika Fatimah (dua kanan) enggau sida ke bukai, kemari. — Gambar Muhamad Rais Sanusi

KUCHING: Raban orang tuai ti beumur 60 taun ke atas di nengeri tu dilalau ngambi peluang minta Kenyalang Gold Card (KGC) taja pan kad nya dipenyadi enggau rasmi kena 7 Mac 2020.

Menteri Pengintu Pengelantang Pendiau, Pengelantang Raban Bansa, Orang Indu enggau Ruang Bilik enggau Pemansang Nembiak Mit Dato Sri Fatimah Abdullah madahka, naka 21 Januari 2020 Opis Pengintu Pengelantang Pendiau Raban Bansa (JKM) Sarawak bisi nerima 8,505 pom peminta Kenyalang Gold Card(KGC), ti diterima ari 12 bagi menua di nengeri tu.

“Kenyau ari mensia mayuh nemu pasal Kenyalang Gold Card (KGC), naka 21 Januari 2020 peminta KGC nitihka bagi menua iya nya Kuching bisi 3,010 peminta, Serian(67), Samarahan (68), Sri Aman(378), Betong(295), Sarikei(686), Sibu(1,641), Kapit(282), Mukah(241), Bintulu(583), Miri(873) enggau Limbang bisi 381 peminta, lalu penyampau semua peminta nya ke diterima JKM Sarawak bisi 8,505 peminta.

“Taja pan Kenyalang Gold Card (KGC) tu deka dipenyadi Kepala Menteri Datuk Patinggi Abang Johari Tun Openg kena 7 Mac (nyerumba ngintu pengerami Hari Orang Indu Antarabansa taun tu) tang peminta kad tu udah berengkah diatu," ku iya, kemari.

Fatimah nyebut pekara nya dalam aum pengarang berita nyuaka geran Opis Orang Indu enggau Ruang Bilik Sarawak (JWKS) enggau nyuaka pom KGC ti diatur ba sebuah hotel ditu.

Berebak enggau tu iya mega muji sereta beterima kasih ngagai timbal mensia mayuh ti chukup manah enggau ngagai gerempung, institusyen, gerempung ukai dikuasa perintah, parti politik sereta ketuai raban bansa enggau ke bukai laban ti udah nulung perintah nengeri mantu raban bansa minta enggau ngisi pom KGC.

Iya mega ngelaluka ngagai enda ngira institusyen tauka ke bukai ti deka nyadi 'strategic partner' baka nyendiaka rebat, diskaun enggau servis ngagai pemegai KGC.

“Kami chukup ngelaluka 'strategic partner' ngambika nyendiaka rebat, diskaun ba produk enggau servis ngagai pemegai KGC, tu ke pengelantang sida (KGC). Tu ngayanka kitai beratka tauka bisi pengibuh ngagai raban orang tuai dalam raban bansa kitai.

“Ngagai barang sapa ke deka nyaup kami mantu orang tuai ngisi pom tu enggau ke deka nyadi 'strategic partner' kami tau madah sereta betemu engau kami.

“Baka ke dipadahka ngagai aku, naka ke seharitu penyampau 'strategic partner' kami udah manggai 31 'strategic partner'," ku iya.

Nambahka nya nyerumba aum pengarang berita nya Datuk Bandar Majlis Bandaraya Kuching Selatan (MBKS) Datuk Wee Hong Seng nyuaka 539 iti pom peminta KGC ke udah diisi ngagai Direktor JKM Sarawak, Joni Nurudin.

Nitihku Wee, 17 Januari tu tadi MBKS mantu 179 iku orang tuai ba Flat KMC ngisi pom peminta KGC lalu dalam dua hari nengah 'One Stop Centr' MBKS bisi 360 peminta, lalu penyampau semua nya bisi 539 iti peminta KGC.

“Diatu maya ujung minggu kaunselor kami bisi ngelawa baka makit, betemu enggau orang ke bedaja enggau ke bukai, bisi urung 2,000 pom ba sida kunsilor, kelimpah ari kami nyendiaka servis ba One Stop Centre ba opis MBKS ari pukul 8.30 pagi ngagai 4.30 lemai.

“Aku ngasaika, kitai nyadi peranak Sarawak ke bendar berasai untung laban perintah kitai ngembuan polisi ti manah lalu tu bepun ari perintah ti tegap. Mayuh penguntung ulih diasaika nengah mayuh polisi ti dipejalaika perintah nengeri kitai.

“Nya alai kitai patut nyukung tauka mantu perintah (bejalaika polisi)nitihka nama ke ulih dibantu kitai," ku iya bejaku ba aum pengarang berita ke sama.

Kelimpah ari berumur 60 taun ke atas, penentap minta KGC mega iya nya pemegai kad pengelala bestatus 'K' tauka bestatus Peranak Tetap Sarawak.

Pom peminta nya ulih diambi nengah website rasmi Opis Menteri Pengintu Pengelantang Pendiau, Pengelantang Raban Bansa, Orang Indu enggau Ruang Bilik enggau Pemansang Nembiak Mit sereta JKM Sarawak tauka seberang penerang tau ditanya ngagai Urus Setia Kenyalang Gold Card ba lumur 082-449577/444139 tauka emel ngagai welfare@sarawak.gov.my.

Ba pengerami tu JWKS nyuaka geran ninting taun JWKS ngagai Persekutuan Perkumpulanan Wanita Sarawak (PPWS) sepenyampau RM150,000, Serakup Indu Dayak Sarawak (SIDS) (RM10,000), Sarawak family Planning Association (RM20,000) enggau Komiti Pengatur Aktiviti MWKS sepenyampau RM54,400).

>Sources:Utusan Borneo Online