Fatimah (tengah) begambar begulai enggau pesereta kus maya Pengerami Graduasyen Kus Apai Indai di Sarawak Club ditu, malam ensanus. Sama bisi dipeda Noriah (lima kiba).
UNGKUP KENANG: Fatimah (tengah) begambar begulai enggau pesereta kus maya Pengerami Graduasyen Kus Apai Indai di Sarawak Club ditu, malam ensanus. Sama bisi dipeda Noriah (lima kiba).

KUCHING: Perintah nengeri ngungkupka RM1 juta ngagai Opis Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit (KWKPK) dikena bejalaika program betapi enggau isu rama.

Menteri KWKPK, Dato Sri Fatimah Abdullah madahka ungkup belanja nya udah dipesetuju ba aum kabinet nengeri kena Hari Empat (Khamis) apin lama.

“Sehari tu (ensanus) lebuh aku mantaika keretas kereja/perambu, kabinet besetuju ngungkupka RM1 juta ti kitai pinta.

“Ungkup belanja tu dikena kitai bejalaika program, betapi tauka mutarka isu ke patut ditapi lebih agi ba raban nembiak,” ku iya.

Iya madahka pekara nya lebuh bejaku ba Pengerami Graduasyen Kus Apai Indai di Sarawak Club ditu, malam ensanus.

Kus nya diatur Alpha Malaysia enggau kerejasama Opis Orang Indu enggau Ruang Bilik Sarawak (JWKS).

Sama bisi datai Direktor JWKS Noriah Ahmad enggau Koordinator Kus Apai Indai Alpha Malaysia Cawangan Sarawak, Dr Wong Howe Tung.

Dulu agi ari nya lebuh ke bejaku, Fatimah madah pekara ti pemadu dikenangika opis menteri iya diatu iya nya pasal isu pengerai mental tauka runding.

Nya alai ku iya ba taun 2020, opis menteri iya deka mekuh ngagai isu rama lalu siti ari nya, iya nya bekaul pengerai mental.

Ke tuju tu, ku iya madah, opis menteri nya deka ngatur program ba tiap bagi menua, pemadu mimit dua pelilih menua dalam tiap bagi menua.

“Sarawak ngembuan raban nembiak munuh diri kedua pemadu tinggi pengudah nengeri Selangor.

“Berindik ari pekara nya, amat beguna ba nembiak, apai indai enggau pengajar beratika ulah munuh diri enggau simptom isu pengerai mental tauka runding baka tusah ati dikena nyeliahka pekara ti enda manah nyadi,” ku iya.

>Sources: Utusan Borneo Online