Fatimah di sempulang Rosey (kiba) enggau Salina (kanan) ba aum pemberita seharitu madah atur ngena CRS dalam entukar endang patut.
Fatimah di sempulang Rosey (kiba) enggau Salina (kanan) ba aum pemberita seharitu madah atur ngena CRS dalam entukar endang patut.

Dikarang Rengenyan Labang

KUCHING: Atur ngena kerusi pengelikun anak mit (CRS) dalam entukar endang patut lebih agi nya bekaul enggau pekara pengelikun.

Menteri Pengintu Pengelantang Pendiau, Pengelantang Raban Basa, Orang Indu, Ruang Bilik enggau Pemansang Nembiak Mit Dato Sri Fatimah Abdullah madahka sebedau tu atur nya kala udah dipenyadika enggau gerempung ukai dikuasa perintah (NGO) ti mai tuju deka meri pemereti ati pasal pengelikun.

"Kitai udah meransang apai indai ke bisi anak mit ngambika bisi nyendika kerusi pengelikun anak mit (CRS) laban kitai beratika ari sukut pengelikun endang bisi pematut.

"Endur duduk ti likun lebih agi anak mit sida bisi endur duduk kediri sereta mega belulang pengelikun kediri empu.

"Ambika chunto nyema bisi penusah bebadi ba jalai alun enti nadai lebih agi belulang pengelikun anak nya ulih tepelasit pansut sereta ulih nabanka nyawa," ku iya lebuh dipinta ngenang pekara nya ba aum pengarang berita, ba SeDidik Perdana UTC, UTC ditu, seharitu.

Dulu ari nya Fatimah nemuai seraya bejalaika pengawa ngagai SeDidik Perdana Opis Kepala Menteri & SeDidik Perdana UTC.

"Opis menteri kami ukai opis menteri ti neritka atur nya, tang kami mega bisi kaul enggau pekara tu. Pekara tu endang patut enggau tuju nyaga pengelikun anak," ku iya.

Taun nyin kemari, Sapit Menteri Besai Datuk Seri Dr Wan Azizah Wan Ismail madahka pengawa ti neritka atur nya berengkah 1 Januari 2020 perintah udah netapka meseti ngena kerusi pengelikun anak mit di dalam entukar dikena nyelamatka anak ari betapi engau sebarang penusah ke ulih nyadi.

Iya madahka atur baru nya dipejalaika berindik ari statistik ti ngirauka lebuh bisi 1,559 pemati dirikodka ti mungkur anak mit ari baruh umur 10 taun, ba taun 2007 ngagai 2017.

"Child Restrain System (CRS) tauka disebut kerusi pengelikun anak mit iya nya kerusi ti digaga khas ti nyaga pengelikun anak mit dalam kereta nyema bisi penusah bebadi baka belantak," ku jaku iya diambi ari sebengkah portal berita.

Sama bisi ba aum pengarang berita nya, Menteri Muda Orang Indu, Ruang Bilik engau Pemansang Nembiak Mit Rosey Yunus; Sekretari Mendam Opis Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik engau Pemansang Nembiak Mit Dr Saadiah Abdul Samat; Menijer Besai SeDidik Nor Ashikin Abdul Rahman, Ketuai Unit Pemansang Tumu Nembiak Mit KWKPK Salina Bujang engau ke bukai.

>Sources: Utusan Borneo Online