Fatimah nyuaka pom peminta Bantu Khas Tungkul Sengayuh ngagai Reylene. Bisi datai (ari kanan) JC Fong, Harden, Chua enggau Dr Wong. - Gambar Chimon Upon
Fatimah nyuaka pom peminta Bantu Khas Tungkul Sengayuh ngagai Reylene. Bisi datai (ari kanan) JC Fong, Harden, Chua enggau Dr Wong. - Gambar Chimon Upon

KUCHING: Yayasan Buah Pinggang Kebangsaan Malaysia (NKF) deka numbuhka sebuah palan hemodialisis di Sarikei dikena nangkup peminta guna pesakit tungkul sengayuh ti majak nambah ba bagi menua nya.

Ketuai Pemesai Eksekutif NKF Chua Hong Wee madah kediatu pengawa ngubah sereta ngemanah rumah endur palan nya benung chakah dipejalai.

“Kitai deka numbuhka siti agi palan dialisis di Sarikei. Rumah ke endur numbuhka palan tu agi dalam proses ngubah enggau ngemanah sereta kitai pechaya nya deka berengkah bejalaika operasyen dalam timpuh dua tauka tiga bulan ari diatu.

“Kitai agi nganti Opis Menteri Pengerai Malaysia (KKM) enggau sekeda ejensi nyengkaum Opis Bomba enggau Penyelamat Malaysia (JBPM) bejalaika pengawa meresa ngambika lisin operasyen sah diberi," ku iya.

Iya madahka pekara nya dalam jaku pengelalu nyerumba penemuai seraya gawa Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit Dato Sri Fatimah Abdullah ngelawa Palan Dialisis NKF (Yayasan Buah Pinggang Kebangsaan) - Persatuan Buah Pinggang Sarawak (KAS)/Rotary ditu, seharitu.

Chua madahka NKF milih numbuhka palan dialisis di Sarikei laban ke diatu nadai palan ti baka nya kelimpah ari ba Sepital Sarikei.

Kelimpah ari nya ku iya NKF mega deka numbuhka palan dialisis di kota Samarahan sereta nya dipelaba berengkah bejalaika operasyen enda lama agi.

“NKF enggau kerejasama sereta sukung ari mayuh ejensi perintah enggau gerempung ukai dikuasa perintah (NGO) numbuhka palan dialisis ba semua nengeri ti enda nyengkaum Negeri Sembilan enggau Melaka. Batang tuju besai NKF iya nya ngiga nengeri tauka kandang endur ti enda mayuh palan dialisis komersial tauka ngiga untung.

“Diatu kitai meri perubat hemodialisis ngagai 1,700 pesakit di serata menua," ku iya.

Kelimpah ari nya Chua madah Palan Dialisis NKF (Yayasan Buah Pinggang Kebangsaan) - Persatuan Buah Pinggang Sarawak (KAS)/ Rotary berengkah bejalaika operasyen ba taun 2000 sereta diatu disikap ngena 18 injin hemodialis enggau 102 pesakit.

Palan dialisis nya ku iya ari baruh tanggungpengawa Pakar Nefrologi Dr Clare Tan enggau dipejalaika 15 staf, diketuai Reylene Ursula Dietar ti nyadi pengatur, semilan indu misi, empat pemantu dialisis enggau siku pengatur opis.

“Tebal agi pesakit kitai ari baruh program ti dipelanja iya nya empat dipelanja perintah besai enggau nengeri, 29 bulih subsidi ari KKM, 59 agi dipelanja PERKESO (Pertubuhan Keselamatan Sosial) laluh 10 agi pesakit sida mayar kediri ungkus berubat tiap sesi.

“Siku pesakit patut berubat hemodialisis tiga minggu sekali," ku iya nerang.

Sama bisi datai, Menteri Muda Pengelantang Raban Bansa Datuk Francis Harden Hollis, Presiden KAS/Rotary Dato Sri JC Fong, Sapit Presiden KAS/Rotary Dr Simon Wong, Ketuai Opis Nefrologi Sepital Besai Sarawak (HUS) Dr Clare Tan enggau Pengurus Pusat Dialisis NKF, KAS/Rotary Reylene Ursula Dietar.

>Sources: Utusan Borneo Online