Abang Johari enggau rintai menteri kabinet ke bukai mandangka Pakej Bantu Khas Sarawakku Sayang COVID-19 ti dibantaika kemari. — Gambar Muhammad Rais Sanusi
SIRUKA RAYAT: Abang Johari enggau rintai menteri kabinet ke bukai mandangka Pakej Bantu Khas Sarawakku Sayang COVID-19 ti dibantaika kemari. — Gambar Muhammad Rais Sanusi

KUCHING: Perintah nengeri kemari mantaika Pakej Bantu Khas SarawakKu Sayang ti mungkur agih belanja urung RM1.154 bilion.

Kepala Menteri, Datuk Patinggi Abang Johari Tun Openg madahka pakej bantu khas tu endang inisiatif perintah nengeri dikena ngurangka empas pengelekai COVID-19 ngagai ekonomi sereta nyaga pengelantang rayat.

“Kami nemu ekonomi dunya enda menuku lalu enggau pemisi COVID-19, nya udah ngasuh balat agi irau ati.

“Ketegal nya perintah ba renggat nengeri udah ngelala bantu ke diberi nama Pakej Bantu Khas Sarawakku Sayang, ti fokus ngurangka empas COVID-19 sereta nyaga pengelantang rayat nengeri," ku iya.

Iya madah munyi nya ba aum media mantaika pakej bantu khas nya di Wisma Bapa Malaysia ditu kemari.

Tambah Abang Johari, pakej bantu khas tu mungkur 16 chara proaktif ti nagit pekereja ba baris mua, ruang bilik enggau komuniti dagang ti begunaka sukung maya ke diatu.

Chara tu nyengkaum, Diskaun Bil Elekterik, Diskaun Bil Ai, Bantu Khas Sarawakku Sayang, Insentif Ninting Bulan Khas Ungkup Pekereja Baris Mua Mutarka COVID-19, Diskaun Suwa Pasar enggau Bansal Bejual, Nadai Yuran Permit enggau Lisin sereta Diskaun 25 Peratu'Kadar Taksiran'.

Chara ke diambi ari baruh pakej bantu khas tu iya nya, Pangguh Bayar Pulai Skim Duit Jali Industri Mit enggau Jelan Pemesai (SPIKS), Nambahka RM20 juta Skim Mikro Kredit Ungkup Semua Industri Mit enggau Jelan Pemesai, Diskaun 30 Peratus Ungkup Suwa Tanah, Nangguhka Premium Tanah sereta Nadai Yuran Lisin Hotel enggau Rumah Endur Bemalam.

Chara bukai nyengkaum Sengkabung Idung enggau Mulut Ke Enda Bebayar, Perengka Nyaga Pekereja enggau Guna Lengkas Sepital,Pemakai Ungkup Semua Pengereja Pengawa Baris Mua Sekumbang Atur Nagang Pemindah (MCO) enggau Diskaun 50 Peratus Suwa HDC Pengelama Enam Bulan.

Abang Johari mega madahka pakej bantu khas tu mungkur belanja terus perintah nengeri ke sepenyampau RM974.75 juta dikena ngurangka empas pengelemi ekonomi sereta ngurangka tating rayat.

“Ba timpuh ke sama, tu deka dipejalaika belama dikena ngerembaika ekonomi Sarawak nuju nyadi nengeri maju manggai ba taun 2030.

“Perintah Gabungan Parti Sarawak (GPS) bekunsika pemedis rayat ba maya ke mar diatu. Kitai enda nemu kemaya penyakit tu ulih ditagang tang aram mih sama nengah tu begulai," ku iya.

Sama bisi datai,Sapit Kepala Menteri Datuk Amar Douglas Uggah Embas, Tan Sri James Masing, Datuk Amar Awang Tengah Ali Hasan enggau semua rintai menteri kabinet nengeri.

>Sources: Utusan Borneo Online