Fatimah lebuh dikerandau raban pengarang berita ba Wisma Bapa Malaysia, seharitu.
Fatimah lebuh dikerandau raban pengarang berita ba Wisma Bapa Malaysia, seharitu.

Dikarang Rengenyan Labang

KUCHING: Semua operator tauka pengemeran taska enggau tadika di serata Sarawak dipinta bejejaga iya nya ngemeratka pemeresi enggau pengerai berindik ari kes Koronavirus Wuhan.

Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit, Dato Sri Fatimah Abdullah madah taja pan ke diatu nadai nembiak mit dipelaba enggau kes nya.

"Kitai minta operator tauka pengemeran taska enggau tadika serata Sarawak enda tau enda bejejaga iya nya ngemeranka pemeresi di dalam kandang endur (taska enggau tadika) enda tau enda dititihka.

"Pekara ti dipejalaika ninting hari iya nya maya datai ba taska enggau tadika dia pengajar deka meresa anak mit nya sebedau tama, baka diperesa pengangat tubuh, meda kali ba jari enggau tubuh. Tu pekara ti dikereja tiap hari sereta patut dititihka lebih agi diatu.

"Nyema ditemu anak nya tabin tauka angat isi pengemeran taska tauka tadika deka enggau lengkas madah ngagai apai indai sereta udah nya apai indai patut enggau lengkas mai anak nya betemu enggau lutur," ku iya lebuh dikerandau raban pengarang berita ba Wisma Bapa Malaysia ditu, seharitu.

Dulu ari nya Fatimah sama ngulu aum 'Tindaka-tindakan Bagi Menghadapi Wabak Wuhan Coronavirus Bil.3' ti diatur Komiti Mutarka Penusah Ngenyit Nengeri (JPBN) Sarawak ti bechairmanka Sapit Kepala Menteri ti nyadi Chairman JPBN Sarawak, Datuk Amar Douglas Uggah Embas.

Bejaku baru iya madahka pengawa bejejaga nya enda tau enda dikemeratka laban pengetan tubuh anak mit bebida enggau orang besai tauka tuai.

Ba aum pengarang berita nya Uggah madahka lapan dipelaba kes Koronavirus Wuhan di Sarawak naka ke diatu sida ti beumur entara 20 ngagai 50 taun.

> Sources: Utusan Borneo Online