Fatimah disempulang Menteri Muda Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit Rosey Yunus (kanan).
NYUKUNG: Fatimah disempulang Menteri Muda Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit Rosey Yunus (kanan).

KUCHING: Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit Dato Sri Fatimah Abdullah gaga Duit Turu Endowmen beungkus RM1,000 ungkup nembiak mit ke baru ada peranak Sarawak agi diberi ba taun baru.

Iya madah, duit turu nya meri pemaik ngagai tiap iku anak mit peranak Sarawak endang patut diteruska.

“Alhamdulillah Kepala Menteri Datuk Patinggi Abang Johari Tun Openg udah madah sentang agih belanja endowmen beungkus RM1,000 ungkup tetiap iku anak mit peranak Sarawak tu diteruska agi ba taun baru ila.

“Endang tentu tu meri pemaik ngagai anak Sarawak ke baru ada ba pekara pelajar sida lebuh manggai umur 18 taun dikena nampung pelajar sekula sida ngagai institusyen pelajar tinggi enggau kolej," ku iya.

Iya madah munyi nya maya dikerandau pengarang berita pengudah sesi bejuraika Bajet Sarawak 2020 ari Kepala Menteri ba Aum Kunsil Nengeri(DUN)ke-18 ditu, kemari.

Kelimpah agih belanja endowmen nya, Fatimah madah,bantu RM450 ungkup indai ke beranak mega ulih ngelempungka tating penusah rayat di nengeri tu.

“Bantu ungkup indai ke beranak sepenyampau RM450 tu enti diperati meri pemaik ngagai bala indai ke beranak enda ngira di menua pesisir tauka mengeri.

“Bantu tu endang manah bendar laban enti ruang bilik bisi nambah, endang tentu guna ninting hari ruang bilik nya nambah nyengkaum nembiak mit ke baru ada lalu nengah bantu RM450 tu ulih nyaup sida," ku iya nerang.

Berebak enggau nya ku iya, opis menteri nya deka ngaluska agi ari sukut bejalaika bantu nya.

“Kitai udah berunding sebedau tu bakani chara kitai deka bejalaika pengawa nya, opis ni ari baruh Opis menteri tu ke bisi bekaul lalu tu mih utai deka dikemanah agi," ku iya nerang.

Nitihka iya, bantu nya nyengkaum semua indai peranak Sarawak ke beranak di nengeri tu.

Kelimpah ari nya, iya mega nyambut manah agih belanja ungkup geran ninting taun khas dikena semua taska enggau tadika ke ngerejista di Sarawak.

“Tu keterubah nya ditumbuhka ti ulih mantu taska enggau tadika dalam nyendiaka pemakai ke bepengerai enggau enda bebayar ngagai nembiak mit kelimpah dikena ba aktiviti pelajar," ku iya.

>Sources: Utusan Borneo Online